Prezidan Joe Biden pral vote nan eleksyon mi-manda yo pandan wikèn nan nan eta kote li gen rezidans li, Delaware. Eta sila a nan nodès Etazini komanse vote Vandredi 28 Oktob.
Lamezonblanch di Biden pral vote ansanm ak pitit pitit li, Natalie, ki gen 18 an e ki pral vote pou premye fwa.
Prezidan Demokrat la ap depoze bilten li nan moman pati li a ap fè fas ak yon gwo defi pou'l kenbe kontwol Kongrè a. Li fikse kom priyorite - ankouraje patizan li yo vote bonè si yo kapab pou ogmante kantite elektè ki al vote.
Biden ap pwofite vote pandan lap pase yon long wikèn lakay li nan vil Wilmington.
Biden pral vizite Filadèlfi Vandredi swa, pou asiste yon evenman pou Pati Demokrat eta Pensilvani an ansanm ak Vis Prezidan Kamala Harris.
