Touris ak Nouyokè te rasanble bo pis patinaj Rockefeller Center la nan Nouyok 10 Septanm pou wè nouvo koleksyon modis Ayisyen Victor Glemaud pou semèn mod Nouyok la - New York Fashion Week.
Pou modis Ayisyen an, ki grandi nan Nouyok, defile a te gen yon siyifikasyon santimantal, men tou li te sèvi pou montre tout moun ke karyè li ak desen li yo ap evolye.
Glemaud di: " Mwen grandi nan Nouyok, donk ide pou'm prezante defile mwen nan Rockefeller Center nan Flippers gen anpil siyifikasyon pou mwen. Mwen grandi nan Queens, e mwen gen zanmi lot bo a kap travay ave'm nan domen mod la depi lontan. Donk ou konnen nou travay di e nou renmen endistri sa a. E ou konnen biznis nou yo se noumenm ki rele yo chè mèt, chè metrès, e nou finanse'l poukont nou. Donk, Fashion Week gen gwo siyifikasyon pou nou. Plis gen moun, se plis nou kontan."
Glemaud te lanse liy rad li a an 2006. Sa pa gen lontan li te kolabore ak magazen Target sou yon koleksyon rad. Met sou sa li kole tèt ansanm ak konpayi Schumacher pou kreye machandiz pou kay.
Glemaud louvri spektak li a ak manken sou paten a woulèt ki te gen sou yo rad trikote - ki se stil ki ba li renome a. Patinè yo te bougie epi yo te ri e danse pou spektatè yo.
Defile a te kontinye ak mannken ki gen rad transparan sou yo, rad dekolte, chanday epi yon nouvo koleksyon linèt.
Glemaud te pran enspirasyon pou koleksyon prèt a pote li a apre yon sejou nan zile Harbour Island, Bahamas.
Glemaud di: "Enspirasyon pou koleksyon sa a se rad spo kontanporen Ameriken melanje ak bel koulè epi sansibilite, ki se yon bagay mwen toujou eseye mete nan koleksyon mwen yo. E se gras ak yon vizit nan Harbor Island, Bahamas. Donk vreman vre mwen melanje 2 bagay sa yo pou fè'l tounen yon koleksyon san efo, ki bay kè kontan, ak yon bagay ou vle mete pandan sezon ete a."
Glemaud di li vle pou koleksyon li pèmèt moun abiye byen san yo pa fè anpil efo epi pou rad yo ba yo kè kontan.
Manken yo te defile sou pis patinaj la ak rad ki sanble sa yon moun ta mete pou'l al pase yon vakans chik bo lanmè.
Koleksyon rad Glemaud a se youn pami 28 koleksyon modis nwa ki bat tout reko e ki te fè pati New York Fashion Week ane sa a.
Pandan pandemi a, modis la te fonde "IN THE BLK" yon konbit kreyatè nwa ki pa dèyè benefis e kap travay nan endistri mod la.
Defile Glemaud a te gen patisipasyon tou, yon seri selebrite TikTok - pami yo influencer Brittany Xavier.
Pandan Glemaud te konsantre'l sou yon seri koulè minim rad li yo te gen yon alur jèn e seksi.
Sou chanday li yo li mete lèt V a -- epi tout moun te bat bravo ak kè kontan lè yo te wè manken li yo ak rad byen sere nan stil leyopa a sou yo.
Sepandan pi gwo moman sware a sete moman lè manman Glemaud, Julie, te pran kriye tèlman li te fyè de sa pitit gason li akonpli.
Manman Glemaud di: "Mwen santi tout kalite bagay. Se lajwa. Se fyète. Se lannmou. Mwen pa vreman gen pawol pou dekri'l. Mwen pa gen bouch. Pou'm wè pitit mwen ak talan li genyen. Se tout sa'm ka di. Mèsi. "
Enfomasyon pou repotaj sa a soti nan Associated Press
