Nan Ikrèn, biwo leta ki jere kesyon kouran elektrik la, Energoatom, anonse gwo izin elektrik Zaporizhzhia a –ki anba okipasyon Larisi depi plizyè semèn deja- sibi pwovizwaman, jedi 25 out la. “yon dekoneksyon total” avèk tout rès sikui nasyonal la. Energoatom lonje dwèt sou Larisi pou sa k rive a. Daprè sa biwo a di, “se aksyon envayisè yo” ki debouche sou dekoneksyon sa a. Li ajoute se premye blackout peyi a konnen depi tout egzistans izin nan, pi gwo izin nikleyè ki genyen sou tèritwa ewopeyen an
Sepandan, Ajans Entènasyonal Enèji Atomik la (AEEA) fè konnen Ikrèn te vin fè l konnen apre sa ke kouran an te retabli gras ak yon santral elektrik ki tou prè rejyon kote izin elektrik Zaporizhzhia a sitiye. Daprè AEEA toujou, poko gen enfòmasyon sou koz dirèk blackout la.
Larisi ak Ikrèn pa sispann lanse kritik kote youn denonse lòt kòmkwa se li ki lanse atak militè tou prè enstalasyon izin Zaporizhshia a, menm nan moman kote kèk lidè mondyal eksprime krent yo pou goumen yo pa debouche sou yon dezas nikleyè katastwofik tankou dezas ki te rive nan Izin Chènobil la nan Ikrèn an 1986. Larisi ak Ikrèn pa okipe apèl yo resevwa nan men dirijan etranje pou yo aksepte kreyasyon yon zòn demilitarize alantou sit nikleyè a.
