Palmantè opozisyon yo nan peyi Nijerya ap pouse lide pou destitye Prezidan Muhammadu Buhari poutèt kondisyon sekirite peyi a k ap agrave. Palmantè yo te soti kite seyans mèkredi a apre prezidan Sena a te refize pèmèt yon mosyon ki bay Buhari 6 semèn pou l amelyore sekirite oubyen fè fas ak destitisyon.
Biwo prezidan an rejte menas la kòm ridikil, malgre menas ensekirite yo rive nan kapital la, semèn sa a.
Se lidè minorite nan Sena a Philip Aduda, ki te pran tèt opozisyon an fè l kite seyans mèkredi a, apre li te vini ak mosyon ki menase pou destitye prezidan an.
Men prezidan Sena a, Ahmed Lawan, ki se manm pati majorite ki rele Kongrè Tout Pwogresis yo ki gen abreje ann angle APC, te fèmen mosyon an touswit e pase nan lòt sijè. Li di Aduda te dwe pale de mosyon an ak li dabò anvan li te prezante l devan palmantè yo.