Minis enèji yo nan Inyon an apwouve yon tèks lwa pou Ewòp la ki vize fè rediksyon 15 pousan nan demann gaz, soti nan mwa Daout pou rive nan mwa Mas.
Pwojè-lwa a vini apre kèk mezi volontè ke nasyon yo nan Inyon an te pran pou redui konsomasyon gaz, e si yo pa fè ase ekonomi, sa ka deklannche aksyon obligatwa nan blòk la ki gen 27 manm.
"Nou oblije, e nou pwal, pataje doulè-a," se sa Minis Endistri nan Tchekoslovaki, Jozef Sikela, di jounalis yo apre li te fin dirije reyinyon an nan Brisèl an Beljik.
Minis enèji yo apwouve pwojè-lwa a yon jou apre sosyete enèji ris Gazprom te fè konnen l ap fè yon rediksyon 20 pousan nan gaz ki ap vini nan manman-tiyo Nord Stream 1 an pou Almay, apati demen mèkredi a. Pri gaz natirèl
moute madi nan nivo ki pi wo depi koumansman mwa Mas, dapre Inyon Ewòp la, e plis pase 5 fwa jan yo te ye, sa gen yon lane.