Nasyonzini anonse lendi ekspòtasyon sereyal ikrenyen an ta dwe rekòmanse nan kèk jou ankò, menm nan moman kote LONU kondane Larisi poutèt li bonbade pò vil Odesa ki bay sou Lanmè Nwa a kèk èdtan sèlman apre li te fin siyen yon akò pou l kite ekspedisyon manje rekòmanse.
Ekspotasyon sereyal yo gen pou sòti nan vil Odesa avek 2 lòt pò ki bay sou Lanmè Nwa a, Chernomorsk avèk Yushnu, daprè deklarasyon pòtpawòl LONU, Farhan Haq, ki ajoute:
“Nou vle gen garanti ke tout kondisyon yo reyini pou bato k ap transpòte manje yo vwayaje an tout sekirite.”
Farhan Haq, ki repete kondanasyon Sekretè Jeneral la, Antonio Guterres, kont Larisi pou atak ak misil li te lanse samdi sou Odesa a, ajoute:
“Tout aksyon ki pa apiye pwojè sa a, natiròlman, se yon bagay ki kont reyisit yon inisyativ konsa. “
Sepandan, Minis Afè Etranjè ris la, Sergye Lavrov, ensiste pou l di: “Pa gen anyen nan angajman ki nan akò sou sereyal nou te siyen nan Istanboul la, ki enpeche nou kontinye operassyon militè espesyal nou an, kote n ap detrui enfrastrikti militè ak lèt objektif militè.”
Larisi fè konnen lendi ke frap ak misil yo sou enstalasyon militè nan Odesa pa ta dwe afekte akò sou rekòmansman ekspòtasyon sereyal yo.
