Nan kad mouvman sa a, LaOland soulve posiblite pou yo kreye yon tribinal espesyal pou jije responsab krim sa yo. Yon rankont entènasyonal ap dewoule nan vil Lahè nan moman nouvèl yo fè konnen Larisi lanse yon lòt atak ki koze lanmò anpil moun nan Ikrèn.
Minis Afe Etranjè olandè a, Wopke Hoekstra, deklare lajistis dwe fè travay li kont sòlda ris ki swadizan komèt atwosite nan Ikrèn yo -e youn nan fason sa ka fè, se gras ak kreyasyon yon tribinal espesyal pou jije akize yo. Minis Hoekstra fè konnen:
“Jan m konprann sa, sè ke nou dwe bouche vid la puiske Tribinal Kriminèl Entènasyonal la (TKE) pa gen jiridiksyon pou sa. Alòs, mwen imajine ke se nou ki pou fè sa k nesesè pou n mete tribinal sa a sou pye. LaOland dispoze jete yon koudèy sou sitiyasyon an, menmsi li sèten ke sa pa pral fasil. Li nesesè pou n fè travay la avèk otan zanmi ke posib ki nan kominote entènasyonal la. “
Ikrèn te deja lanse apèl pou l mande kreyasyon yon tribinal konsa –ki ta dwe sanble ak sila LONU te fòme pou jite responsab atwosite ki te fet pandan jenosid Peyi Wannda avek ansyen Yougoslavi a.
Peyi ki prezan nan rankont Lahè a pwomèt yon sòm 20 milyon dola pou apiye travay Tribinal Kriminèl Entènasyonal LONU an ou TKE, ak espesyalis ki pral mennen ankèt sou swadizan move zak tèrib ki lye avèk lagè Larisi lanse nan Ikrèn nan. Larisi demanti ke l ta vize sivil nan Ikrèn.