Reprezantan Pèmanan Lèzetazini nan LOTAN an, Julianne Smith, ki t ap pale mèkredi nan Washington, fè konnen pwogrè Larisi fe nan jou k pase yo pa rive ebranle fèm volonte alyans la, kote kèk manm ap kontinye kenbe lafwa nan fòs militè Ikrèn yo.
Madam Smith, ki t ap pale devan Gwoup Ekriven pou Defans la, deklare:
“Kolektivman nan lOTAN, mwen panse nou espere e nou kwè viktwa a se pou Ikrèn li pral ye finalman. Nivo respè nou konstate nan tout nivo alyans la pou fòs militè ikrenyen yo, se yon nivo ki vreman wo. Nou konstate gen moman kote sòlda yo ap anvanse… Nou konstate tou gen moman kote fòs militè ikrenyen yo rive repouse lennmi.”
Julianne Smith pale konsa yon jou apre Washington te anonse li pral voye bay Ikrèn sistèm zam ki pi sofistike, k ap gen ladan yo Wot Sistèm Rocket pou Atiyri Mibil M142, ki rele tou HIMARS.
Prezidan Joe Biden defann desizyon sa a nan yon editoryal ki parèt jedi nan jounal The New York Times, kote li di sistèm rocket avanse sa a pral ede Ikrèn “frape avèk plis presizyon objektif-kle ki sou chandbatay yo.”
Otorite ikrenen yo te pase plizyè semèn ap mande tip zam sa yo ki, dapre yo, nesesè pou yo fè fas ak atiyri ris la ki pèmèt lennmi fè pwogrè nan rejyon Donbas la.
