Lidè repibliken yo nan Sena ameriken an bloke, nan jounen jedi 26 me a, efò Demokrat yo t ap fè pou yo kòmanase fè deba sou yon lejislasyon pou kobat teworis nan peyi a nan moman 2 pati yo pa antann yo sou kesyon pou konnen ki mwayen ki pi bon pou yo mete kontwòl sou vyolans ki fet avèk zam nan peyi a.
Chanm de Reprezantan an, ki anba kontwòl Demokrat yo, te apwouve lejislasyon an semèn pase a apre yon fiziyad ki te touye anpil moun pi devan nan mwa a nan vil Buffalo, Eta New York, kote yon atakan blan gen pou l reponn akizasyon deske li te vize 10 moun nwa epi li te touye yo anba koutzam.
Efò Demokrat yo ap fè pou deba kòmanse fèt sou yon lejislasyon konsènan teworism Ozetazini --2 jou apre yon jenn gason te touye 21 moun nan yon lekòl nan Tekzas-- echwe ak yon vòt 47-47; kidonk yo pa rive jwenn 60 vwa ki te nesesè pou yo evite yon blokaj repibliken.
Demokrat yo, ki pase plizyè lane san yo pa rive elimine opozisyon Repibliken yo kont yon kontwòl pi sevè sou lavant zam ak verifikasyon dosye kriminèl yon moun anvan li ka achte zam, ap fè yon lòt efò pou yo jwenn yon konpwomi ak Repibliken yo apre trajedi ke yon jenn gason 18 tan komèt nan Tekzas la.
Okenn siyn pa montre ke senatè repibliken yo dispoze kite opozisyon yo a tonbe, nan moman anpil nan yo deklare yo ta vyole dwa Ameriken yo genyen pou yo achte zam si otorite yo kòmanse tcheke dosye kriminèl yon moun k ap achte zam.
