DAVOS, Lasuis (Reuters)- Prezidan ikrenyen an, Volodymyr Zelenskyy, pran lapawòl jodi a devan lidè komès ak endistri mondyal yo, ki reyini nan vil Davos, nan Lasuis, kote li di lemond ap fè fas ak yon tounan nan istwa li e yo dwe ranfòse sanksyon yo kont Larisi kòm yon avètisman pou lòt peyi ki ta panse itilize lafòs sovaj kont yon lòt. Prezidan ikrenyen an, ki pale pa video konferans, deklare:
“Listwa rive nan yon tounan… Se vreman moman kote pou n deside eske lafòs brital e sovaj pral dirije lemond.”
Diskou Zelenskyy a sèvi pou inogire Fowom Ekonomik Mondyal la k ap dire 4 jou e ki rasanble nan Davos anviwon 2 mil lidè sektè ekonomik la, avèk diferan espesyalis.
Yon manm delegasyon Ikren nan nan Davos, Vitali Klitschko, majistra vil Kyèv la, fè asistans la konnen: “Chak moun ki la a dwe konprann sa: Se nou menm pèsonèlman n ap defann. An fèt, n ap batay pou chaken nan nou e tout moun dwe konprann sa.”
Ane sa a Ikrèn reprezante prensipal pwen ki sou pwogram diskisyon yo nan rankont ekonomik Davos la.
