Ikrèn fè konnen jodi mèkredi a te gen yon akò preliminè ak LaRisi pou evakye sivil nan vil Mariupol ki anba syèj, pandan LaRisi ekzije ankò pou rès sòlda ki rete yo kite sa.
Vis premye-minis Iryna Vereschuk di antant pou yon koulwa imanitè ta kite fanm, timoun ak granmoun aje yo pati.
Vereschuk rapòte 3 jou youn apre lòt te pase san yo pa te ka tabli okenn koulwa imanitè nan peyi a.
LaRisi te fikse yon delè mèkredi pou konbatan yo rann tèt yo. Yon delè Madi te pase kote LaRisi fè konnen okenn nan twoup Ikrèn yo pa te aksepte òf pou yo rann tèt yo pou yo ka jwenn sekirite.
Devlopman sa-yo nan Mariupol vini nan moman LaRisi te kontinye ajoute sou prezans militè li nan rejyon Donbas la ki gen yon enpòtans estratejik. Ministè defans Grand
Bretay la fè konnen batay ap ogmante nan rejyon an kote fòs ris yo te chache travèse liy defans Ikrèn yo.
