Jounal la di, ke envazyon Moskou a nan Ikrèn mete Lèzetazini nan on pozisyon poul bay atansyon patikilye ak tout peyi ki alye Prezidan Ris la Vladimir Putin genyen nan Amerik Latin nan.
AFP te eseye rantre an kontak ak, pòtpawòl administrasyon Prezidan Joe Biden, ni ak Misye Maduro, tou 2 pa t reponn demann AFP pou fè kòmantè.
Lèzetazini koupe relasyon diplomatik ak Venezyela apre Prezidan Maduro te re-eli an 2018 nan yon vòt ke Lèzetazini konsidere kòm yon fwod elektoral.
Lè sa a, Washington te deklare ke li rekonèt lidè opozisyon an Juan Guaido, prezidan palman an, lè li te deklare tèt li prezidan pwovizwa an janvye 2019.
Lèzetazini te enpoze yon pil sanksyon sou Caracas nan yon tantativ pou fòse Maduro soti nan pouvwa a.
Youn nan mezi yo, ki te aplike nan mwa avril 2019, anpeche Venezyela vann gaz li - ki te reprezante 96% revni peyi a - sou mache ameriken an.
Dapre New York Times, vizit aktyèl Depatman Deta ak Mezon Blanch ofisyèl yo nan Caracas gen rapò tou ak swadizan enterè Washington pou ranplase kèk nan gaz li achte nan men Larisi kounye a ak gaz ke li te sispann achte nan men Venezyela.
Mezon Blanch lan te di Vandredi li t ap konsidere kijan pou redwi enpòtasyon gaz Ris apre envazyon Ikrèn lan san yo pa fè mal konsomatè Ameriken yo epi pandan l ap kenbe rezèv mondyal la.
Etazini te siyale mwa pase a ke li ta vle revize politik sanksyon ke li te mete sou Venezyela si chita pale ant gouvènman Maduro a ak opozisyon an - te lanse nan mwa Out.
