Konsèy Sekirite Nasyonzini an gan pou'l vote Dimanch sou yon sesyon espesyal dijans (yon bagay ki pa rive souvan) pou 193 manm Asanble Jeneral yo diskite envazyon La Risi fè nan Ikrèn nan. Sesyon espesyal sa a ta dewoule Lendi, dapre diplomat yo.
Vot 15 manm konsèy la se yon pwosesis, kidonk 5 manm pèmanan yo -La Risi, La Chin, La Frans, Angletè ak Etazini - kapab poze veto yo. Mezi a bezwen 9 vot an favè e li gen anpil chans pou'l pase, dapre sa diplomat yo di.
Gen sèlman 10 sesyon espesyal dijans konsa ke Asanble Jeneral la oganize depi ane 1950. Demann pou yon sesyon sou Ikrèn vini apre La Risi te poze veto li Vandredi sou yon pwojè rezolisyon Konsèy Sekirite LONU an ki te anvizaje deplore envazyon Moskou a. La Chin, End ak Emira Arab Ini te absteni (yo pat vote ditou) tandiske lot 11 manm yo te vote an favè mezi a.
Asanble Jeneral la ta gen pou'l vote sou yon rezolisyon konsa apre plizyè jounen kote plizyè peyi pral fè deklarasyon pandan sesyon espesyal dijans la, diplomat yo fè konnen. Rezolisyon Asanble Jeneral yo pa egzije peyi yo pran okenn aksyon, men yo gen pwisans politik.
