Yo fè anons sa a byen bonè nan jounen vandredi a nan yon rankont dijans ki dewoule nan Brisèl.
Yo pran dispozisyon sa yo nan moman nouvèl t ap rapòte ke twoup militè ris yo t ap fonse pi pre kapital Kyèv la, Ikrèn.
Se 2èm seri sanksyon Inyon Ewòp la ap pran kont Moskou nan mwens ke yon semèn, a kote saksyon ke Lezetazini ak lòt peyi oksidantal yo pran. Lidè IE yo fè konnen yo pral frape Larisi nan 5 domèn diferan: finans, enèji ak transpò, epi sektè kontwòl ekspòtasyon ak politik viza.
Ursula von der Leyen, prezidant Komisyon Ewopeyèn nan, ki se bra egzekitif inyon an, fè konnen sanksyon sa yo pral gen yon konsekans maksimal sou ekonomi ris la ak elit politik peyi a. Madam Leyen deklare:
“ Seri sanksyon sa yo gen ladan l sanksyon finansye ki koupe aksè Larisi nan mache kapital ki pi enpòtan yo. Kounyela a, nou vize 70% mache bankè Larisi a; men nou vize tou prensipal konpayi leta posede yo, pami yo gen domèn defans la. “
Kèk analis, tankou Marie Dumoulin, yon ofisyèl nan Konsèy Relasyon Etranje Inyon Ewòp la, panse ke kriz Ikrèn nan ap jwe yon bon wòl nan sans ke li rasanble ansanm yon gwoup 27 manm ki pa toujou antann yo.
