Minis defans Ris la anonse gwo egzèsis militè yo ap kontinye tou pre ikrèn men kèk inite ki te kantone nan sid ak wès fwontyè a ap kòmanse retounen nan baz yo apre yo finn konplete egzèsis militè yo.
Anons pou diminye plis pase 100,000 solda sou fwontyè ikrenyen an rive avan chanselye alman an Olaf Scholz te rankontre ak prezidan ris la Vladimir Putin nan yon misyon pou evite yon gè epi lanse yon pinga bay otorite ris yo, sizoka yo ta atake Ikrèn yo ap sakaje yo ak sanksyon. Larisi deklare li pa gen plan pou anvayi vwazen li Ikrèn.
Chanselye alman te vizite Putin on jou apre li fè yon chita pale ak prezidan ikrenyen an Volodimyr Zelenskyi nan kad yon dyalòg diplomatik peyi oksidantal yo ap fè pou eseye desann tansyon ki genyen nan mitan 2 peyi yo.
Chanselye alman Olaf Scholz deklare lendi ke peyi yo nan loksidan "pare pou yon dyalòg serye ak LaRisi sou kesyon sekirite ann Ewòp" men ke y-ap tann tou pou Prezidan ris Vladimir Putin soulaje menas envazyon ke li ka fè nenpòt lè nan Ikrèn nan. L’otan ak etazini fè larisi yon seri pwopozisyon ke nou sipòte. Kounye a n ap tann reyaksyon larisi.
Nan yon videyo prezidan Zelenkyi pibliye li deklare li okouran sòlda ris yo kapab travèse fwontyè a pa pita ke mèkredi . Prezidan ikrenyen an dekrete jounen mèkredi a kòm yon jou inite nasyonal.
Malgre tout pale sa yo, li pa finn sèten ki dat Larisi kapab atake ikrèn.
Karine Jean Pierre ki se Asistan pòt pawòl Mezon Blanch la deklare "tankou nou deja di l nou trouve n nan liy dwat ki montre nou ke yon envazyon kapab kòmanse nenpòt ki jou. Nou pap fè plis kòmantè sou detay ke sèvis enfòmasyon nou yo jwenn, sel sa nap di nou yon envazyon kapab kòmanse semen pwochèn nan. Etazini pare pou kèlke swa sitiyasyon an."
Jens Stoltemberg kis se sekretè jeneral l’Otan an di li pa wè okenn aktivite ki montre sòlda ris yo kòmanse retounen nan baz yo. Sekretè defans ameriken an Lloyd Austin gen pou l patisipe nan yon rankont Minis Defans L’OTAN yo ap fè semèn sa a nan vil Brusèl an Beljik avan li vizite Polòy ak Lituani 2 peyi vwazen Ikrèn.
Sekretè Jeneral Nasyonzini an Antonio Guterres mande Larisi, Ikrèn ak peyi Oksidantal yo pou de-eskalade tansyon yo lè l fè konnen pa gen anyen ki ranplase diplomasi.
