KYEV - Angletè pare pou frape La Risi ak sanksyon san pèdi tan ki va vize enterè komèsyal li yo ak pèsonaj wo plase si li anvayi Ikrèn. Se sa Premye Minis Britanik la, Boris Johnson anonse Madi.
"Li esansyèl pou Moskou konprann ke nap aplike sanksyon sa yo otomatikman, tou swit apre nempot ki envazyon li ta fè sou teritwa souvren Ikrèn nan," Johnson deklare pandan yon konferans pou laprès nan Kyiv.
"Nou pral prezante yon nouvo pwojè lwa nan palman an kap pèmèt nou vize ak presizyon...enterè estratejik La Risi genyen yo dirèkteman epitou enterè komèsyal endividyèl Ris yo."
La Risi demanti li gen entansyon anvyi Ikrèn.
Johnson, ki te pran la pawol a kote Prezidan Ikrèn nan, Volodymyr Zelenskiy, deklare Ikrèn pral reziste tout envazyon.
"Mwen kwè bagay ki pi enpotan nou ka fè se fè pèp Ris la, sitwayen nan la Risi reflechi sou posibilite sa a ak reyalite ke lame Ikrèn nan pral genyen batay sa a," Johnson deklare.
Li ajoute ke gen 200,000 gason ak fanm nan fos zame Ikrèn ki pare pou yo toumen ak tout fos yo.
"Mwen kwè paran, manman pitit nan la Risi te dwe reflechi sou verite sa a e mwen espere ke Prezidan Putin rekile sou chimen konfli a epi angaje'l nan diyalog pito," Johnson deklare.
